Marîz olmayana derman olunmaz
Taleb kılmayana ihsan olunmaz

Meşakkat çekmeyen bulmaz terakki
Belâsız vuslat-ı cânân olunmaz

Ne hoş yerdir bu ‘ışkın hân-kâhı
Ki andan özgede mihmân olunmaz

Mahabbet şahına kul olmayınca
Dü-kevnin mülkine sultân olunmaz

Şarâb-ı ‘ışkı gel nûş eyle sûfî
Anı içmeyicek sekrân olunmaz

Hudâyı ‘ışk-ıla bildi bilenler Ki ansız sâhib-i ‘irfan olunmaz

Sivâdan ‘âşıkı tecrîd ider ‘ışk Bu ‘ışk olmayıcak ‘uryân olunmaz

Sakın ‘uşşâkı ta’yîr itme sûfî Oların sırları tibyân olunmaz

Mücerred zühd ü takva ile zinhar Ma’ârif cevherine kân olunmaz

Özini sanma kim inşân olubdur Kuru da’vâ ile inşân olunmaz

Hemân taklîd ile ol Kird-gâra Yakîn ü sıdk-ıla îmân olunmaz.

Bu ‘ilm-i müstedillîn ile asla Hakikat iizre Hak îkân olunmaz

Zevahir ehli kurtulmaz gümândan Ledün ‘ilminde hîç nâdân olunmaz

Riyâ şirk-i hafidir ancılayın Bu yolda sâlike hüsran olunmaz

Tutulmış ‘ucb-ıla mürâ’î
kalbin Tonuk gönülde ‘ışk iskân olunmaz

Enâniyyetle merdûd oldı İblîs Tevazu’ idene hizlân olunmaz

Halâ’ik içre alçak kendini bil Kibirden bed Haka ‘isyan olunmaz

Eğer oldun ise nâ’il bu ‘ışka Sivâya bakmağa imkân olunmaz.

Bu ‘ışk bir tâc-ı devletdir ki başa
Anı giymeyicek sultân olunmaz

Hemân dûr olma Kuddûsî bu ‘ışkdan Ki ‘ışksız vâsıl-ı Yezdan olunmaz..